galleria foto, clicca sulla foto per ingrandire, freccia in alto per tornare indietro
Testamént Vècia Pòpa 2017
E sì són ‘ncora qua
da burta e vècia rónca
mé tóca sénpre a mi mi
fa chéla che le cónta!
Nó rièse gnanca a lède
ché són ‘(a)nca mèda òrba
e có nó voi sentì
fae fénta de èse sórda!
Epur sò sénpre tut
el bèl e anca el burt
e cónte cón pasión
chél che me fa inpresión.
E pì devénte vècia
e pì i mé fa danà…
che longa stó an la strada
per vegnì a mé fa brusà.
A fa stó giro lónch
me son anca godésta
i é stati ben de pì
chi che mé à vist per ‘sta gran festa!
E se chél altro an
ò patì ai pìe tant fret
stó an ò drio le caspe
e nò pì i sandalét!
E prima de partì
ò vardà sul calendario:
zentozinquanta ani
de l’Istituto Minerario!
Penséve mó, tosat,
có sié de bant a sgióndo,
che valénti i nòs periti
in giro par el mondo!
E ‘n altro aniversario
nisun se à recordà:
Tito Livio Burattini
nó se pól deśmentegà.
A scóla le maestre
le vé avarà spiegà
che chésto gran sienẑiato
l’é ‘na personalità.
El é partì da qua
in tel lontan sieẑento…
e ‘l dì òto de marẑ
i é stati quatroẑènto.
En cin de comemoraẑión
segur mal nó farà
a un nasést in Àgort
che el metro el à inventà.
Adès fé muci tuti
che vói despetolàme
e chi che nó ghé còmoda
fae de manco de scoltàme!
Ma tache cón creànẑa:
da nó deśmentegase,
de chi te fa ‘n piaẑér
biśògna regordàse.
E alóra, cari Alpini,
da véra bòna dént
se nó mé dési ‘n quèrt
ère fóra sót al ténp!
Paràda via de caśa,
che l’é ròbe da mat,
se tochée ‘ndà in albergo
mé magnée fóra tafàt!
E grazie anca ai vìgili
che i laora da bonóra
e che i mé fa rivà
pròpio come ‘na gran sióra!
Stó an nó sarò lónga
ma gnanca nó vói taśe
vé dighe fóra drét mi
tut chél che nó me piaśe!
Vé cónte sénpre chéle,
nó sté dime su aśenàde,
nó ghé la mòle a bate
se nó le é comedàde!
Voi nó mé credaré
ma da dóvena ere bèla
‘na òlta i mé à anca fat:
la “Miss de Val de Frèla!”.
E chésto l’é per dive:
scolté – per carità! –
L’é da vardà polìto
per nó fase inbotonà!
E volarìe tacà,
ma fursi ò capì mal…
no i l’à ‘ncora fenìda
de sturigàne l’ospedàl?
Ièśumarénde mìsi,
nó ghé n’inpòse pì!
Me tóchelo cruẑiàme
de nòt e anca de dì?
Ma rìveli pó a cióme
se ciàpe en gran śgorlón…
o mèio che provéde
a postàme ìnte a Taibon?
I dis che qua in provincia
par el volontariato
sión mèio de chiàltri…
ma par quaśi en reato!
Ché se sión de gran cór
che aiuta chésti e chéi,
com’éla che l’é lóri
a… sparagnàse i schèi?
N’altra de chéle vèce
l’é i vas de fiór in piaẑa
che nó i è gnanca burti, per dì la verità,
ma soratùt domande:
“Ónde ‘ndóne a parchegià?”
Nó sò se són caẑénta,
nó mé par ‘na gran pretéśa:
per méte le caréte
butóne dò la céśa?
Sta storia dei parchégi
nó la é pròpio mai fenìda
va ben che ghé n’é póchi
ma dói pas nó l’é fadìga!
Nó sté fame fa la part
de chéla insatanàda,
òbe da dighe ai vigili
de dave ‘na stangàda?
Dài po’ tośat, coràio!
Dónse ‘nca ‘n cin na man
nó sté lasàme in giro
i sachét dei vòsi can!
E po’… la tangenzial!
Tośat, mé sénte mal!
Fortuna che nó guide
e nó ò gnanca pì ‘l caval!
Ché qua nó l’é mia ‘n scherzo
chéi là i à fat el bòt
e chéi trèi póre mus
i li à ciapàdi sót!
Sperón che i la fenìse,
sta granda strada nova
dasén mé piaśarìe
podé pasà de là…
mé méte tuta bula
e pó ndón anca a balà!
Vé dighe in confidénza
che són ‘n cin preocupàda
par via anca de le scuàze
e dei bidói che l’é ‘nté strada.
I à dit che da st’istà,
i né spiegarà in riunión,
per trà ìa racadùre
nó sarà pì confuśión.
Sperón de nó sbalià
e de nó capì baléngo:
ocór intivà el bidón
se nó se va a reméngo!
Tra tute ste magàgne
ghé n’aón de ‘n’altra sòrta:
anca de ròbe bóne
ghé n’é en sac e po’ ‘na spòrta.
Vardé la gioventù
che nó à sólche difèt
che in mèz a chéi revèrs
l’é el bón e anca el drét.
Ché nó mé gòde mia
a tirà sénpre su la chila
biśògna faghe onór
al “Progeto (20.000) vintimila!”.
E sót la scòrza dura
l’é anime da artisti
i Musici, valenti!
Che premi! I avéo visti?
Se vét che noi sión fati
per ‘ndà in giro a cantà
ché anca el Coro Agordo
stó an ‘l à festegià.
Nó vói tiràve negri
podón fenìla qua
ché dopo nó diśéve
che nó fae che brontolà.
Ma spèta, spèta, òrco!
Ere drio deśmentegàme…
Vé ‘n cónte ‘ncora una
se avé vóia de scoltàme.
I né darà el tormento
che stó an nó l’é stat néf
e i né tirarà mostri
che dovón patì la séf!
Eh, bèla sì, anca chésta,
na bèrta da ganàse
na bala come ‘n altra
par ne aumentà le tase.
Sta òlta, ròba strana
nó la ghé ‘ndata mal:
nó ghé ò dit gnanca su
a la Giunta Comunal.
Ma che nó i créde, nò po’
de fa bén tut chél che i fa!
L’é sólche che son stufa
de cridà e de śberegà!
Ma una la é poténte,
e chéste nó l’é cagne,
avée dit che taśée
ma nó pòs pròpio sparagname…
Ai Sindaci ghé dighe:
“Ma v’inascordéo cande
che i dirigenti ULS
i vé cava le mudànde?!”
A noi né riva sénpre
sul ciopìn na bèla scàndola
e lóri a fin de l’an
i sé ciapa la sò màndola!
Stó an son pròpio agra
e anca inbramolìda,
bruśéme senza storie
e che la sìe bèlche fenìda.
Che bèla sta saùda
de fame sfumegà…
cusì nó se coméda
tut chél che vé ò contà!
E a mi nó mé interèsa
de èse en basalìsco,
ve céne mi de òcio
pì arente che nò ‘l fisco!
Invéze de pensà
sénpre e sólche de fa i bèi
vardé che no i ve bruse
anca i vòs zervèi!
Né mànchelo po’ che po’
in te ‘sta bèla val
se nò che ‘n cin de vóia
de nó volé sta mal?!?
Vardé de fa polìto
e de nó fame bazilà
che ò tuti i mè mestieri
e anca altro da pensà!
Con chésto vé salùde,
mé són bén despiuràda,
spetéme n’altro an
ché sarò ‘ncora imbilàda.
E adès inpizé el fóch
e come fuse na gran tècia
diśòn insieme e forte:
“Bruśón, bruśón la vèciaaaaaaaaaa!!!!!!!!!!!!!!!!!!”