DIME, PARE…
Se ti te se lasù
e che te sa,
dime chi che l’è stat
a far sto mondo qua.
Chi à creà la Luna,
el Sol e le Comete,
le Stèle che su in ziel
le brila e le sta cete;
e l’Orsa, quela granda
e la Stela Polar,
le stele del futuro,
la Tèra, el ziel, e ‘l mar?
Dime chi che l’è stat.
Quando che ere cèo
e stée sui to danòci,
questo te domandée,
vardandote ‘n te i oci.
E ancora olée saèr,
se su ghe n’era dent
in te quei mondi palidi
o i li èa fat par gnent.
Ti te me crezéa,
te me contéa ‘na storia,
po’ mi ne indormenzée
e tut finìa in gloria.
Adès che son dha vecio
e scrive ste memorie,
nisun pi me careza,
me conta de le storie;
e reste de le ore,
fis a vardar le stéle,
filando su quei astri
le teorie pi béle.
“Posibil, (mi me dighe,
po’ dopo) che ‘l Creator,
el epie fat sto frupio
se a l’omo no ‘l ghe ocor”.
Alora mi conclude:
“De zert no l’è cusì;
el Creato durerà an milion de ani e pì
prima ch’el pose eser
incerament usà
par quel che da ‘l prenzipio
el era destinà”.
Ma son cusì curios
che no resiste pì,
e sente na gran oia,
de corer su da ti,
parché te me despieghe
e, sentà sui to danoci,
mi scolte le to storie
vardandote ‘n te i oci.
Giancarlo Dal Prà, 1972